一個人生活在爾虞我詐的商業社會,多多少少都會遇到一些老千騙局,

只要你頭腦清醒,不貪心,意志堅定,就沒有一個老千可以成功昆到你口袋裡的錢.

以下我會寫一些我遇過的,也是香港常見的騙局給大家參考,說不定你也見識過~

(一)模特兒騙局

行過銅鑼灣近sogo的一條路,會有一個中年女人周圍同路過的女仔講話佢公司搵緊大/中/細碼衣服的模特兒,問你有無興趣去試,我遇過兩次,兩次都係佢未講完我就走左,一句話都唔洗同佢講,我心諗:佢居然想找我落手,對我黎講簡直係侮辱! 呢d招數睇過報紙雜誌都知,一上到去就會話你有咩咩問題唔可以即刻接job,要俾幾多萬去買佢地的美容護膚套餐,做完之後先可以接job,但係受害人俾晒錢之後就無晒聯絡,到時受害人就會驚覺受騙,真係智力正常都唔會中招!

(二)旅遊會籍騙局

呢d通常都係打個電話黎,話你中左咩咩獎,可以獲得一個價值幾多的旅遊會籍或者xx星號雙人幾多天旅遊套票,但係要親身上去聽完講座先可以拎到,咁呢d我同公貓都遇過幾次,可想而知白撞率幾高! 次次都係俾我鬧爆佢收場,因為浪費左我一分鐘通話時間. 同樣又係睇過雜誌報導都知,呢d又係一上到去根本唔係講座,而係屈人俾錢買會籍騙局,十萬八萬買返黎係永遠唔會用得到的東西,佢地會扣起你張咭碌左先,再用人牆戰術加疲勞轟炸迫你簽名,只要你意志堅定話要報警,就可以順利走甩,但係你已經浪費左時間又得唔到獎品,所以不如一開始學我咁鬧爆佢收線算數!

(三)傳銷騙局

有d類似旅遊會籍騙局,但其可怕之處係由你至信任的親友們出手欺騙你,而唔係單純一條茂丙打黎昆你. 傳銷騙局多數都係由你的舊同學,親戚朋友約你食飯,跟住話唔記得帶野,叫你陪佢上去佢"公司"拎野,一上到去就介紹佢公司,叫你聽講座,跟住又係人牆戰術加疲勞轟炸迫你俾錢加入,再俾一d唔值錢既貨品俾你,話俾你聽好值錢(同寶藥黨,高科技黨招數差唔多),又話好好賣可以賺成千萬,仲叫你帶埋d親戚朋友落疊咁你就可以發大達云云. 有時都會叫d"傳銷雞"在網上交友的地方昆d狗公出黎,然後用對波頂佢上去行騙,有時都會出賣色相,故有"傳銷雞"之稱.

但其實我覺得只要唔係低能就唔會中招,邊有可能咁易賺錢?咁香港仲點會有窮人呀?果d咩香薰(最狼係亮x思),健康食品(hxxx life)等等都唔值咁多錢,幾十元貨賣你幾千幾萬元,用個腦諗下都知無可能咁多人用咁值錢. 不過為免你有時間思考,佢地會成班人迫你,再加上出賣你的果位親戚朋友都會落足嘴頭叫你借財務公司,實在非常令人心寒!!

受害者都係18至廿幾歲的年輕人,本兔18歲時都遇過一個成年無聯絡的同學打黎叫我聽講座,話有得搵大錢云云,我一聽就知佢中左咩騙局,叫佢回頭是岸,佢係懶醒果類人,成日覺得自己最叻,又睇唔清自己咩身份,又成日講大話,覺得有佢呃人無人呃到佢的人,仲覺得要搵大錢好容易,唔駛好似其他人咁辛苦工作,剛好傳銷就係昆呢種人,咁佢要俾人呃我都阻唔到,忠告俾左佢就算,點知佢仲話:"我都係想幫你咋! 本來想預埋你一齊搵大錢,你要窮咪繼續囉!" 咁我都知佢中毒幾深,話唔定佢已經係一隻"傳銷雞",所以我收左線都覺得好唏噓......

(四)認親認戚白撞騙局

呢個就最好笑,都唔知點解會有人中招,我以為只有阿婆阿伯先會係目標,點知原來佢地咩人都會試! 仲要係當面先好笑! 本兔試過收到電話(無來電顯示)佢一開始唔出聲,就係想等人講野,問佢係咪邊個邊個,再認屎認屁,但係我喂左幾聲之後佢改變策略,話自己係某某疏堂親戚(我都唔記得左係咩),我一聽到知咩事就唔洗講即收線,真係采佢都有味!

公貓遇到果次仲搞笑,因為係條街度當面問佢:"我係咪見過你?" 咁果時公貓以為佢係公司(好大間,超多同事)同事之類的物體,於是就問:"下?你係邊個呀?" 點知條友話:"唔係呢,我真係見過你,係咪咩教會?"(呢個時候公貓就知佢係白撞黨,都唔明點解佢會覺得公貓有去教會!貓對此都覺得好嬲!) 跟住當然係即走啦! 條友居然跟埋黎,仲追住問:"我記得你啦,你大個左咁多,你升左中幾呀?"(佢講呢句簡直低能,如果識貓,無理由唔知貓的年紀同外表有幾大落差) 公貓返黎同我鬧條友都痴能線! 出黎做野成十年問佢升中幾!! 有病返屋企食藥啦!! 呢d咁既騎呢怪真係好少遇到,當笑話聽下就算~

仲有林林總總的手法,係街問你有無散銀找換的又有,直頭問你要錢的又有,話自己無帶錢的都有,本兔都一慨不理,不知人生經驗豐富的你又遇過幾多呢? 不妨跟兔子分享一下~

創作者介紹
創作者 DoctorRabbit 的頭像
DoctorRabbit

DoctorRabbit的兔子禁獵區

DoctorRabbit 發表在 痞客邦 留言(0) 人氣()